Mkpụrụokwu a bụ aka ekpe nwere ụfọdụ echiche e ji ya ezipụta ma e wepụ nghọta o nwere dị ka mkpụrụokwu. Echiche ndị ọzọ ahụ na-egosi etu asụsụ Igbo si egosipụta nsirihụndụ ndị Igbo. Ime aka ekpe n'asụsụ Igbo apụtaghị naanị iji akụkụ ahụ mmadụ nke ya na aka nri na-arụkọ ọrụ ọnụ were me ihe kama o nwere echiche ndị ọzọ ọ na-ezipụta. Ụfọdụ oge, a na-enwe nghọtahie na mmekorita mmadụ na ibe ya n'etiti onye Igbo na onye abụghị onye Igbo n'ihi enweghi nghọta n'ihe kpatara na ndị Igbo anaghị anabata aka ekpe. O bụ ihe mwute na ọtụtụ ndị Igbo enweghi nghọta na nsirihụndụ ndị Igbo dị iche iche. Ihe na-ebute enweghi nghọta a bụ enweghi mmasị n'asụsụ Igbo. Ndị nne na nna anaghizi asụrụ ụmụ ha Igbo site n'uzo dị etu a na-anapụ ụmụaka dị etu ahụ nghọta echiche miri emi nke na-apụta ihe naanị site n'iji asụsụ Igbo akparịta ụka. Ebumnobi nchọcha a bụ ime ka ọha mata na asụsụ Igbo oge ụfọdụ nwere nghọta miri emi ọ na-enwe. Nghọta a na-enyekwanu aka n'iziputa nsirihu ndị Igbo. Nchọcha a chọkwara ịchọpụta echiche dị iche iche ndị Igbo ji aka ekpe ezipụta. Atụtụ ọdịmara na atụtụ njirieme ka a ga-agbaso iji gosi na nghọta dị iche iche ndị Igbo nyere aka ekpe n'etiti onwe ha bụ nke ziri ezi. A chọpụtara na ndị Igbo na-ewere iji aka ekpe nye ma ọ bụ nara mmadụ ihe dị ka nleda anya nye onye a na-enye ma ọ bụ anara ihe. A chọpụtakwara na aka ekpe na-egosi ọtụtụ ihe na nsirihụndụ ndị Igbo dị ka mmadụ iji aka ekpe teta ụra na-egosi na ihe anaghị aga nke ọma na ndụ onye ahụ n'ụbọchị a na-ekwu maka ya. Aro nchọcha a bụ ka ndị Igbo gbasie mbọ ike na-asụ asụsụ ha n'ihi na ọ bụ otu ụzọ ha si pụọ iche n'agbụrụ ndị ọzọ ma bụrụkwa ụzọ ha si egosi nsirihụndụ ha. Nchọcha a ga-abara ndị Igbo niile uru ọ kacha ime ka ha ghọta mkpa ọ dị ha ịsụ asụsụ Igbo nke bụ otu ụzọ ha siri pụọ iche na mba ndị ọzọ nakwa ụzọ ha si egosi etu ha si ghọta ụwa.
Keywords: Nsirihụndụ, Ndị Igbo, Asụsụ, Ọdịmara, Aka ekpe